Mawa Cimata (Ipan Ridwan)

 

Sajak-Sajak Ipan Ridwan

 

Rungsing

Sakedapan hemeng

Dina tangtung peuting nu masih panjang

Basa cahaya bulan mabrak naranjangan

Sagigireun bentang mubyar nu laluncatan

Lir katebak angin marengan herewos kasuka

 

Kiwari.

Imut anjeun meredongna ngarungkup diri

Mawa hebos kacua nu balawiri

Silih udag ku tunggara

 

Renghap anjeun mawa cimata

Marengan urugna katugenah

Ngamalirkeun rasa mangrebu kuciwa

 

Taya Harti

Ngencarkeun panenjo wungkul

Halimun jadi lalangse

Eunteup dina gunung anu parentul

Keur dioconan heulang anu kakalayangan

Didinya dina eta pasir

Meubeutkeun diri dianteur angin

 

Lalaunan halimun nyimbutan

Panenjo jadi moekeun

Anu karasa ukur cimata

 

Nempoan panenjo anu teu nempo

Marengan leketey hate ngurugeun jajantung

Didieu

Ibun bajra noelan rasa

Nyingkahkeun lengkah

 

Makaulan diri dina tapak anu nyata

Ningan teu wasa

Paneuteup kasawey

Dina lengkah leutik taya harti